Пс Псалтыр, псалом Псалтыр, псалом 7
Песьня-плач, якую Давід сьпяваў Госпаду ў справе Хуса, з племя Веньямінавага.
Госпадзе Божа мой! на Цябе спадзяваньне маё; уратуй мяне ад усіх маіх ганіцеляў, і вызвалі мяне;
хай ня вырве ён душы маёй, быццам леў, які турзае, калі збаўцы няма.
Госпадзе Божа мой! калі што я зрабіў, калі ёсьць няпраўда ў руках маіх,Ёў 31:7
калі я ліхам плаціў таму, хто быў у згодзе са мною, - а я ж ратаваў і таго, хто бяз прычыны стаўся маім ворагам,1Цар 24:7; 1Цар 26:9
дык няхай вораг перасьледуе душу маю і дагоніць, і жыцьцё маё хай удратуе ў зямлю, і славу маю хай аберне ў нішто.
Устань, Госпадзе, у гневе Тваім; паўстань супраць шаленства маіх ворагаў, прачніся дзеля мяне на суд, які Ты прызначыў,
сьціжма людзей стане навокал Цябе; над ёй падыміся ў вышыні.
Гасподзь судзіць народы. Судзі мяне, Госпадзе, паводле праўды маёй, паводле беспахібнасьці маёй.Быц 18:25; Пс 25:1
Хай суймецца злосьць бязбожных, а справядлівага ўмацуй, бо Ты выпрабоўваеш сэрца й нутрыну, праведны Божа!1Цар 16:7; 1Пар 28:9; Ер 11:20; Ер 17:10; Ер 20:12; Адкр 2:23
Шчыт мой у Богу, Які шчырых сэрцам ратуе.
Бог - судзьдзя справядлівы і Бог - кожны дзень спаганяе сурова,
калі хто не навяртаецца, Ён вострыць Свой меч, напінае Свой лук і цаляе зь яго;Плач 2:4; Плач 3:12
рыхтуе яму прылады сьмерці, і вагністымі робіць стрэлы Свае.
Вось напраўду зачаў бязбожны, зацяжарыў крыўдаю і ману сабе спарадзіў,Ёў 15:35; Іс 59:4
капаў дол і выкапаў яго, і ўпаў у яму, якую выкапаў:Пс 9:16; Пс 56:7; Выс 5:22
абернецца злосьць ягоная на ягоную галаву, і зладзейства ягонае на цела ягонае ападзе.Нээм 4:5; Пс 139:10
Слаўлю Госпада па праўдзе Ягонай і сьпяваю імю Госпада Ўсявышняга.