Кал Каласянам, раздзел Пасланне да Каласян, раздзел 3
Дык калі вы ўваскрэсьлі з Хрыстом, шукайце ўзгорнага, дзе Хрыстос сядзіць праваруч Бога.Мк 16:19; Рым 8:34
Пра ўзгорнае думайце, а не пра зямное,Флп 3:20
бо вы памерлі, і жыцьцё вашае схаванае з Хрыстом у Богу.Рым 8:24; Гал 2:20
Калі зьявіцца Хрыстос, жыцьцё нашае, тады і вы зьявіцеся разам з Ім у славе.1Ян 3:2; Флп 3:21
Дык мярцьвіце члены вашыя, што на зямлі: распусту, нячыстасьць, жарсьць, благое пажаданьне і хцівасьць, якая ёсьць ідалапаклонствам,Эф 5:3
за што гнеў Божы прыходзіць на сыноў непакорнасьці,1Кар 6:9
сярод якіх і вы раней хадзілі, калі жылі між імі.
А цяпер вы адкіньце ўсё: гнеў, ярасьць, ліхоту, блюзьнерствы, брыдкаслоўе з вуснаў вашых;Рым 6:4; Эф 4:22; Габр 12:1
не хлусіце адзін аднаму, распрануўшыся са старога чалавека з учынкамі ягоныміЛяв 19:11; Эф 4:25
і апрануўшыся ў новага, які абнаўляецца ў пазнаньні паводле вобразу Таго, Хто яго стварыў,Быц 1:27; Быц 5:1; Быц 9:6; Эф 4:24
дзе няма Грэка і Юдэя, абразаньня і неабразаньня, барбара, Скіфа, слугі, свабоднага, але ўсё і ў-ва ўсім Хрыстос.Гал 6:15
Дык апраніцеся, як выбраныя Божыя, сьвятыя і ўлюбёныя, у міласэрнасьць, ласкавасьць, пакору, ціхасьць, доўгацярплівасьць,Эф 4:32
церпячы адзін аднаго і прабачаючы адзін аднаму, калі хто на каго мае крыўду, як Хрыстос дараваў вам, гэтак і вы.Мц 6:14; Рым 13:8; Рым 15:1
А па-над усё [апраніцеся] ў любоў, якая ёсьць вузел дасканаласьці,
і няхай гаспадарыць у сэрцах вашых супакой Божы, да якога вы і пакліканыя ў адным целе, і будзьце ўдзячныя.Эф 4:3; Флп 4:7
Слова Хрыстовае няхай жыве ў вас багата, у-ва ўсякай мудрасьці; навучайце і настаўляйце адзін аднаго псальмамі, і гімнамі, і сьпевамі духоўнымі, у ласцы сьпяваючы Госпаду ў сэрцах вашых.Эф 5:19
І ўсё, што вы робіце, словам або справаю, усё [рабіце] ў імя Госпада Ісуса, дзякуючы праз Яго Богу і Айцу.Габр 13:15
Жонкі, падпарадкоўвайцеся мужам вашым, як прыстойна ў Госпадзе.Эф 5:22
Мужы, любіце жонак і ня будзьце для іх прыкрымі.1Пётр 3:7
Дзеці, слухайцеся бацькоў у-ва ўсім, бо гэта падабаецца Госпаду.Эф 6:1
Бацькі, не зьнеахвочвайце дзяцей вашых, каб яны не гублялі духа.
Слугі, у-ва ўсім слухайцеся паноў паводле цела, не на вачах толькі паслугуючы, як тыя, што людзям дагаджаюць, але ў шчырасьці сэрца, баючыся Бога.1Пётр 2:18; Эф 6:5; Ціт 2:9
І ўсё, што робіце, рабіце ад душы, як для Госпада, а не для людзей,
ведаючы, што ад Госпада атрымаеце ў нагароду спадчыну, бо вы служыце Госпаду Хрысту.
А хто робіць крыўду, атрымае паводле зробленае крыўды, бо няма [ў Бога] ўзіраньня на аблічча.Дзеі 10:34; Эф 6:9