Выс Выслоўі, раздзел Кніга выслоўяў Саламонавых, раздзел 20
Віно зьдзеклівае, сікера галасьлівая, і кожны, хто блукае з імі, ня мае мудрасьці.Іс 28:7; Эф 5:18
Ярасьць валадара — як рыканьне ільва, хто выклікае яе, грашыць супраць душы сваёй.Выс 19:12
Слава для чалавека — пакінуць спрэчку, а ўсе неразумныя задзірлівыя.
Гультай ня хоча араць, бо холадна, таму будзе прасіць у час жніва, і [не атрымае] нічога.
Намеры ў сэрцы чалавека — глыбокія воды, але разумны чалавек вычэрпвае іх.Выс 18:4
Багата людзей абвяшчае пра міласэрнасьць сваю, але праўдамоўнага чалавека хто можа знайсьці?Мц 6:2; Лк 18:8
Праведнік ходзіць у беззаганнасьці сваёй, шчасьлівыя сыны ягоныя пасьля яго.Дрз 7:13
Валадар, які сядзіць на судовым пасадзе, раскідвае вачыма сваімі ўсякую ліхоту.
Хто можа сказаць: «Я ачысьціў сэрца маё, я чысты ад грэху майго»?3Цар 8:46; 2Пар 6:36; Ёў 14:4; Пс 51:7; 1Ян 1:8
Неаднолькавыя вагі і неаднолькавая эфа, адно і другое — агіда для ГОСПАДА.Выс 11:1
Нават у юнака па паводзінах можна зразумець, ці чыстыя, ці правыя справы ягоныя.
Вуха, якое чуе, і вока, якое бачыць, — ГОСПАД зрабіў і адно, і другое.Вых 4:11; Пс 94:9
Не любі спаць, каб табе не зьбяднець, адкрый вочы свае, і насыцішся хлебам.
«Дрэннае, дрэннае», — кажа пакупнік, а калі адыйдзецца, тады хваліцца.
Ёсьць золата і мноства пэрлінаў, але найкаштоўнейшая рэч — вусны разумныя.
Забяры адзеньне яго, бо ён паручыўся за чужога, і за чужынца вазьмі заклад ад яго.Выс 27:13
Салодкі чалавеку хлеб ашуканства, але потым пяском напоўняцца вусны ягоныя.
Думкі ўмацоўваюцца парадамі, і з разважлівасьцю вядзі вайну.
Хто ходзіць абмоўнікам, той выяўляе таямніцы, дык ня зьвязвайся з тым, хто рот свой разьзяўляе.Выс 11:13
Хто кляне бацьку свайго і маці сваю, у таго сьветач патухне сярод глыбокай цемры.Вых 21:17; Ляв 20:9; Мц 15:4; Мк 7:10
Спадчына, на пачатку пасьпешліва здабытая, ня будзе пры канцы дабраслаўлёная.
Не кажы: «Я адплачу за зло», спадзявайся на ГОСПАДА, і Ён выбавіць цябе.Выс 17:13
Агіда для ГОСПАДА — неаднолькавыя вагі, і шалі падманлівыя — ня добра.
Ад ГОСПАДА крокі чалавека, і як жа чалавеку зразумець шлях свой?Пс 37:23
Пастка для чалавека — пасьпешліва зрабіць шлюбаваньне, а пасьля абяцаньня разважаць.Дзеі 5:4
Мудры валадар раскідае бязбожнікаў і зьверне на іх кола [малатарнае].Выс 20:8
Сьветач ГОСПАДАЎ — дух чалавечы, ён дасьледуе ўсе сховы нутра.
Міласэрнасьць і праўда ахоўваюць валадара, і міласэрнасьцю ўмацоўваецца пасад ягоны.Выс 16:12
Слава юнакоў — сіла іхняя, а веліч старых — сівізна.Выс 16:31
Вытні і раны — лекавальная масьць, [якая пазбаўляе] ад ліхоты, і ўдары [ачышчаюць] глыбіню нутра.