Рым Рымлянам, раздзел Пасланне да Рымлян, раздзел 9
Праўду кажу ў Хрысьце, не хлушу, сьведчыць мне сумленьне маё ў Духу Сьвятым,
што вялікі смутак мой і няспынны боль у сэрцы маім,
бо я хацеў бы сам быць адлучаным ад Хрыста за братоў маіх, родных мне паводле цела,Вых 32:32
якія ёсьць Ізраільцяне, якіх ёсьць усынаўленьне, і слава, і запаветы, і даньне законаў, і служэньне, і абяцаньні,Вых 4:22; Вых 20:1; 1Цар 4:21
якіх і бацькі, і з якіх Хрыстос паводле цела, Які ёсьць над усімі Бог, Які дабраслаўлёны на вякі. Амэн.Мц 1:1; Лк 3:23
Але ня так, што слова Божае ня споўнілася. Бо ня ўсе тыя, што з Ізраіля, Ізраіль,Лік 23:19; Рым 3:3
і ня ўсе тыя, якія насеньне Абрагама, дзеці [ягоныя], але: «У Ісааку будзе названае насеньне табе».Быц 21:12; Габр 11:18
Гэта значыць, ня дзеці цела ёсьць дзеці Божыя, але дзеці абяцаньня лічацца за насеньне.Гал 4:28
Бо слова абяцаньня гэткае: «У гэту пару прыйду, і ў Сары будзе сын».Быц 18:10
I ня толькі, але і Рэбэка зачала за адзін раз ад Ісаака, бацькі нашага.Быц 25:21
Бо калі яны яшчэ не былі нарадзіўшыся і не зрабілі нічога добрага ці ліхога, каб вызначэньне Божае заставалася паводле выбраньня, не праз учынкі, але праз Таго, Хто кліча,
сказана было ёй: «Большы будзе служыць меншаму»,Быц 25:23
як напісана: «Якуба Я палюбіў, а Эзава зьненавідзеў».Мал 1:2
Дык што скажам? Няўжо няправеднасьць у Бога? Няхай ня станецца!Дрз 32:4
Бо Ён кажа Майсею: «Зьлітуюся над тым, над кім зьлітуюся, і зьяўлю міласэрнасьць таму, каму зьяўлю міласэрнасьць».Вых 33:19
Таму [выбраньне залежыць] не ад таго, хто хоча, і не ад таго, хто бяжыць, але ад Бога, Які літуецца.
Бо Пісаньне кажа фараону: «Дзеля таго Я падняў цябе, каб зьявіць на табе сілу Маю і каб імя Маё было абвешчана на ўсёй зямлі».Вых 9:16; Вых 14:4
Дзеля гэтага над кім хоча, літуецца, а каго хоча, закамяняе.
Дык ты скажаш мне: «Што Ён яшчэ вінаваціць? Бо хто супрацьстане пастанове Яго?»Іс 46:10; Ер 49:19
Наадварот, чалавеча! Хто ты такі, што спрачаешся з Богам? Ці скажа зьлепленае таму, хто зьляпіў: «Навошта ты мяне гэтак зрабіў?»Іс 29:16; Іс 45:9
Ці ня мае ўлады ганчар над глінаю, каб з таго самага месіва зрабіць адно начыньне на пашану, а другое — на ганьбу?Ер 18:4; Ер 18:6; 2Цім 2:20
Што, калі Бог, хочучы зьявіць гнеў і зрабіць вядомай магутнасьць Сваю, з вялікай доўгацярплівасьцю ашчаджаў начыньні гневу, прыгатаваныя на загубу,Рым 2:4
каб таксама зрабіць вядомым багацьце славы Сваёй над начыньнямі міласэрнасьці, якія Ён загадзя прыгатаваў на славу,Рым 8:28
і над намі, якіх паклікаў ня толькі з Юдэяў, але і з паганаў?Рым 3:29
Як і ў Осіі Ён кажа: «"Ня Мой народ" назаву Маім народам, і "Нялюбую" — улюбёнай.1Пётр 2:10
І будзе, што на месцы, дзе сказана было ім: “Вы — ня Мой народ”, — там будуць названыя сынамі Бога Жывога».Ас 2:1
А Ісая крычыць пра Ізраіль: «Хаця б лічба сыноў Ізраіля была, як пясок марскі, рэштка будзе збаўлена;
бо, сканчваючы слова і прысьпешваючы ў праведнасьці, хутка зьдзейсьніць Госпад слова на зямлі».Іс 10:22
I як раней сказаў Ісая: «Калі б Госпад Магуцьцяў не пакінуў нам насеньня, мы сталіся б, як Садом, і былі б падобнымі да Гаморы».Іс 1:9; Быц 19:24
Дык што скажам? Пагане, якія не імкнуліся да праведнасьці, атрымалі праведнасьць, праведнасьць праз веру.Рым 10:20
А Ізраіль, які імкнуўся да закону праведнасьці, не дасягнуў закону праведнасьці.Рым 11:7
Чаму? Бо не праз веру, але праз учынкі закону. Бо яны спатыкнуліся аб камень спатыкненьня,
як напісана: «Вось, Я кладу на Сыёне камень спатыкненьня і скалу згаршэньня; і кожны, хто верыць у Яго, ня будзе асаромлены».Іс 8:14; Іс 28:16; Пс 118:22; Мц 21:44; Мк 12:10; Лк 2:34; Лк 20:17