Выс Выслоўі, раздзел Кніга выслоўяў Саламонавых, раздзел 8
Ці ж мудрасьць ня кліча? Ці ж розум ня ўзносіць голас свой?Мц 11:19; 1Кар 1:24
На вяршынях гораў, пры дарозе, на ростанях стаіць яна,
каля брамаў, пры ўваходзе ў горад, пры дзьвярах кліча яна.
«Да вас, людзі, я клічу, да сыноў чалавечых голас мой!
Навучыцеся, неразумныя, цьвярозаму мысьленьню, і вы, бязглуздыя, прыдбайце сэрца разумнае.Пс 92:7
Слухайце, бо буду гаварыць пра рэчы важныя, і расчыняцца вусны мае, каб сказаць рэчы справядлівыя.Мц 7:29
Бо праўду выкажа язык мой, і няправасьць — брыдота для вуснаў маіх.Ян 8:46
Выслоўі вуснаў маіх праведныя, няма ў іх хлусьні і крывадушнасьці.Пс 12:7
Усе яны простыя для разумнага і правыя для тых, што знайшлі веданьне.
Прыйміце настаўленьне маё, а ня срэбра; лепш веды, чым чыстае золата,Ёў 28:15; Выс 3:14
бо мудрасьць лепшая за пэрлы, і ніякія каштоўнасьці не параўнаюцца з ёю.Ёў 28:16
Я, мудрасьць, жыву разам з цьвярозым мысьленьнем і шукаю веданьня і разважлівасьці.Лк 11:49
Страх перад ГОСПАДАМ — ненавідзець ліхоту, пыху і фанабэрыстасьць; шляхі ліхія і вусны крывадушныя я ненавіджу.
У мяне рада і сапраўдная мудрасьць, я — розум, у мяне сіла.
Дзякуючы мне валадары валадараць і князі дзейнічаюць праведна.Быц 49:10; Дан 2:21; Рым 13:1
Дзякуючы мне начальнікі кіруюць, і магнаты, і ўсе судзьдзі зямлі.
Я люблю тых, якія мяне любяць, і тыя, што мяне шукаюць, знойдуць мяне.
У мяне багацьце і слава, незьнішчальныя скарбы і праведнасьць.Выс 3:16
Плод мой лепшы за золата, і золата найчысьцейшае; і карысьць ад мяне лепшая за срэбра адборнае.Ёў 28:17
Я хаджу сьцежкамі праведнасьці і шляхамі правасудзьдзя,
каб даць тым, што любяць мяне, у спадчыну даброцьці, і скарбніцы іх я напоўню.
ГОСПАД меў мяне на пачатку шляху Свайго, раней стварэньняў Сваіх, спакон вякоў.Ян 1:1
Спрадвеку я пастаўлена, ад пачатку, перш, чым зямля паўстала.
Я нарадзілася, калі яшчэ не было бяздоньняў, калі не было крыніцаў, напоўненых водамі.
Перш, чым горы былі асаджаны, перад узгоркамі я нарадзілася,Пс 90:2; Пс 110:3
калі Ён яшчэ не стварыў ані зямлі, ані палёў, ані пачатковых пылінак сусьвету.
Калі Ён прыгатоўваў нябёсы, я была там. Калі Ён крэсьліў скляпеньне над абліччам бяздоньня,
калі засноўваў аблокі ўгары, калі ўмацоўваў крыніцы бяздоньня,Ёў 26:8; Ёў 36:29
калі вызначаў для мора статут ягоны, каб воды не перакрочвалі межы свае, калі закладаў падваліны зямлі,Ёў 38:10
я была ў Яго дойлідам і была пацехай [Яго] кожны дзень, радуючыся перад абліччам Яго кожны час,Ян 5:20
радуючыся на заселенай зямлі Яго, і пацеха мая — з сынамі чалавечымі.Ян 1:10
І цяпер, дзеці, паслухайце мяне, і шчасьлівыя тыя, якія трымаюцца шляхоў маіх.Пс 119:1; Лк 11:28
Слухайце настаўленьне, і будзеце мудрымі, і не адкідайце яго.
Шчасьлівы чалавек, які слухае мяне, чуваючы кожны дзень пры брамах маіх, стоячы на варце пры парозе дзьвярэй маіх.Мк 3:20
Бо хто знойдзе мяне, знойдзе жыцьцё і атрымае ласку ад ГОСПАДА,
а хто грашыць супраць мяне, шкодзіць душы сваёй; усе, якія ненавідзяць мяне, любяць сьмерць».