Пс Псалтыр, псалом Псалтыр, псалом 108
Сьпеў. Псальм Давіда.
Умацаванае сэрца маё, Божа! Буду сьпяваць і выслаўляць [Цябе] ў славе маёй!Пс 57:8
Збудзіцеся, псалтыр і гусьлі! Я пабуджу сьвітаньне!
Буду славіць Цябе сярод людзей, ГОСПАДЗЕ, і буду выслаўляць Цябе сярод народаў,
бо па-над неба вялікая міласэрнасьць Твая, і праўда Твая — да аблокаў.Пс 36:6
Узьвялічся па-над неба, Божа, і па-над усёй зямлёй [няхай будзе] слава Твая!Пс 57:6
Каб былі ўратаваныя ўмілаваныя Твае, збаў правіцай Тваёй і адкажы мне!Пс 60:7
Бог сказаў у сьвятасьці Сваёй: «Я ўзрадуюся! Я падзялю Сыхем і даліну Сукот разьмераю.Пс 60:8
Мой Гілеад, Мой Манаса, і Эфраім — моц галавы Маёй! Юда — заканадаўца Мой!Пс 60:9
Мааў — міса для мыцьця Майго; на Эдом кіну сандалы Мае; над [зямлёй] Філістынскай радасна гукаць буду!»
Хто ўвядзе мяне ў горад умацаваны? Хто завядзе мяне ў Эдом?Пс 60:11
Ці ж ня Ты, Божа, нас пакінуў і не выходзіш, Божа, з войскамі нашымі?Пс 60:12
Дай нам успамогу ў прыгнечаньні [нашым], бо марны ратунак чалавечы.
З Богам мы зьявім сілу, і Ён растопча прыгнятальнікаў нашых.Пс 60:14