Выс Выслоўі, раздзел Кніга выслоўяў Саламонавых, раздзел 14
Мудрая жонка будуе сабе дом, а неразумная руйнуе яго сваімі рукамі.Выс 12:4; Выс 24:3
Хто ходзіць проста, той баіцца ГОСПАДА, а хто крывіць шляхі свае, той грэбуе Ім.Ёў 12:24
У вуснах неразумнага дубец пыхлівасьці, а вусны мудрых захоўваюць іх.Як 3:5; Выс 12:6
Дзе няма скаціны, там ясьлі пустыя, але багата прыбытку ад сілы вала.
Сьведка праўдзівы ня схлусіць, а сьведка фальшывы дыхае няпраўдай.Вых 23:1; Выс 12:17
Насьмешнік шукае мудрасьці, і яе няма, але веданьне лёгкае для разумнага.
Адыйдзі ад чалавека дурнога, бо ня знойдзеш вуснаў разумных.
Мудрасьць разумнага — у разуменьні шляху свайго, а неразумнасьць дурняў — у ашуканстве.Пс 139:24
Неразумныя сьмяюцца з віны, а пасярод правых — зычлівасьць.
Сэрца ведае горыч душы сваёй, і ў радасьць ягоную ня ўвойдзе чужынец.
Дом бязбожнікаў будзе зьнішчаны, а намёт правых закрасуе.Выс 12:7
Ёсьць шлях, які слушны ў вачах чалавека, але канец яго — шляхі сьмерці.Выс 16:25
І ў часе сьмеху баліць сэрца, і заканчэньне радасьці — смутак.
Падступны сэрцам насыціцца шляхамі сваімі, а добры чалавек — сваімі.Іс 3:10
Неразумны верыць кожнаму слову, а разумны разважае пра крокі свае.Рым 16:18; 1Ян 4:1
Мудры баіцца і адварочваецца ад зла, а дурны гняўлівы і самаўпэўнены.Пс 111:10
Скоры на гнеў робіць дурасьць, а чалавек зламысны зьненавіджаны.Выс 12:16
Неразумныя атрымліваюць у спадчыну дурасьць, а разумныя ўкарануюцца веданьнем.Эф 5:15
Ліхія паклоняцца перад добрымі, а бязбожнікі — каля брамаў праведнікаў.Іс 60:14
Бедны зьненавіджаны нават бліжнім сваім, але шмат тых, хто любіць багатага.Выс 19:7
Хто цураецца бліжняга свайго, той грашыць, а хто літуецца над бедным, той шчасьлівы.Пс 41:2; Мц 5:7
Ці ж не заблукалі тыя, якія задумляюць зло? Але міласэрнасьць і праўда будзе тым, якія задумляюць добрае.
З кожнае працы будзе прыбытак, а ад пустых словаў — толькі нястача.Выс 12:11
Карона мудрых — багацьце іхняе, а вянок дурняў — глупства іхняе.Выс 10:16; Выс 27:22
Сьведка праўдзівы ратуе душы, а хлусьлівы дыхае няпраўдай.Выс 12:17
У страху перад ГОСПАДАМ моцная пэўнасьць, і для сыноў Сваіх Ён будзе прыстанішчам.Выс 18:10
Страх перад ГОСПАДАМ — крыніца жыцьця, каб пазьбегнуць пастак сьмерці.Выс 10:17; Выс 10:27; 2Цар 22:6
У мностве народу веліч валадара, а ў малалікасьці людзей — загуба князя.
У павольнага на гнеў багата розуму, а запальчывы выяўляе дурасьць.Выс 19:11
Лагоднае сэрца — жыцьцё для цела, а зайздрасьць — парахненьне косткам.
Хто прыгнятае ўбогага, той зьневажае Творцу ягонага, але шануе Яго той, хто літуецца над бедным.Выс 17:5; Мц 25:36
Бязбожнік будзе адкінуты за ліхоцьце сваё, а праведнік і пры сьмерці сваёй мае надзею.Ёў 21:17; Пс 73:18; Пс 112:8
У сэрцы разумнага жыве мудрасьць, і паміж дурняў яна вядомая.
Праведнасьць узвышае народ, а грэх — ганьба для народаў.Выс 11:11
Зычлівы валадар да слугі разумнага, але абурэньне ягонае на таго, хто асаромлівае яго.Лк 7:2; Рым 13:3